Tha an t-seamrag iongantach. A bheil sibh eòlach air an t-seamraig? ’S e lus a tha innte. Tha i ainmeil ann an Èirinn. Ann an Gàidhlig na h-Èireann ’s e seamróg a chanas iad. Thàinig a’ Bheurla shamrock bhuaithe sin.
Tha cuid ag ràdh gur e Naomh Pàdraig a thug an t-seamrag a dh’Èirinn. Chuir e às do na nathraichean an toiseach. Cha toigh le nathraichean seamragan, a
rèir beul-aithris. Chuir Naomh Pàdraig cluaintean dhen t-seamraig ann an Èirinn. Às dèidh sin, cha robh na nathraichean a’ dol a thilleadh!
Ach a bheil e soilleir dè an lus a tha anns an t-seamraig? O shean, b’ e a’ Ghàidhlig air clover – seamar. ’S e seamar beag – seamrag. ’S
e an t-seamrag bhàn a chanas Gàidheil na h-Alba ri white clover no Trifolium repens. Tha am facal a’ nochdadh ann an
ainmean-àite. Tha Beinn na Seamraig anns an Eilean Sgitheanach agus tha Loch na Seamraig air a’ Pharbh. Tha na h-ainmean sin a’ ciallachadh “clover
mountain” agus “clover loch”.
Ach tha lus eile ann air a bheil “seamrag” uaireannan. ’S e sin Oxalis acetosella – the wood sorrel. Tha na duilleagan trì-bhileach, mar a tha
duilleagan Trifolium. An e Oxalis no Trifolium a chleachd Naomh Pàdraig ann an leasan mun Trianaid? Uill, chan eil sinn
cinnteach. Ach bha an lus aige trì-bhileach. Bha an naomh a’ mìneachadh teagasg na Trianaid. Thuirt e gun robh Athair, Mac agus an Spiorad Naomh fa leth
ach nan aon, dìreach mar a tha duilleagan na seamraig.
Bha an àireamh a trì mar rud sònraichte do na pàganaich mu thràth. Ach càite a bheil sin a’ fàgail na seamraig air a bheil ceithir bileagan air gach
duilleig? The four-leaved clover. Ann am mòran chultaran, tha e a’ toirt deagh fhortan do dhuine. ’S e a’ Ghàidhlig air four-leaved clover “seamrag nam buadh” – the shamrock of the virtues. Seamrag nam buadh.
Dè nì thu ma lorgas tu seamrag nam buadh? Uill, cuir fod theanga i. Thathar ag ràdh gum faigh thu comasan ùra – comasan mar an dà-shealladh!
